حالة من اللا شىء

حالة جاتنى فجأة كده تقدروا تقولوا حالة من الملل الغير مسبب أو يمكن مسبب كل شىء جايز

هى بصراحة ماجاتنيش فجأة هى كانت موجودة بس مستخبية ودلوقتى ظهرت فى أبهى صورة,كل يوم بعمل نفس الحاجات كل يوم نفس الناس إللى بتخنقنى ونفس الناس إللى بتيجى عليا ,مش بس الناس حاجات كتير بقت تخنق العيشة والروتين والمذاكرة ,حتى المذاكرة إللى كانت بالنسبالى شىء عادى بقت تخنق وغريبة أوى لدرجة إنى أول ما قعدت أذاكر ما كملتش نص ساعة حتى ,قومت على طول على المدونة وغيرت شكلها تماما زى ماانتو شايفين ,بس لو ينفع الواحد يتغير بسهولة زى المدونة كده كانت العملية بقت فل .

ماحدش فاهم حاجة حواليا كله همه ياكل وينام وخلاص ,صدقونى أنا مش أينشتاين بس فين التجديد؟ حتى الناس إللى بتقولك إحلم بحاجة وحاول تحققها ,أنا خلاص زهقت من الاحلام عاوز أعيش الحقيقة ,هو أنا هعيش الواقع إمتى؟ لما أموت؟ جايز برضو.

طبعا الواحد لازم يقول الحمد لله على كل شىء بس الناس فاهمة الجملة دى غلط ,فاهمين إن الحمد لله يعنى أكبر دماغى وأقعد مأنتخ طول حياتى باكل وبشرب وبنام يبقى كل شىء عال العال,لأ لأ لأ لأ لأ لأ وإللى هيقوللى كلمة

(طالما بناكل ونشرب يبقى كله تمام)

ممكن أقتله فيها عشان أنا خلاص طهقت ومش قادر أستحمل بعد كده ,ظروف إقتصادية وقولنا ماشى ,ظروف إجتماعية وقولنا ماشى, ظروف مادية قولنا ماشى ,ظروف نيلة عاطفية وقولنا مش مهم نقفل على قلبنا ونحط فوقيه يافطة مكتوب عليها (توفى منذ آلاف السنين) , لازم تاخد كورسات عشان تعرف تشتغل ده طبعا غير الوسطة إللى لازم تحضرها ,لازم إللى تبات فيه تصبح فيه ولو عملت غير كده تبقى مجنون ومش طبيعى ,لازم تبقى نمطى عشان تنجح ,لازم الناس كلهم يبقو شبه الدمينو ,أرقام عمرهم مختلفة بس كلهم فى الاخر دومينو,بس خلاص كفاية بقى زهقت كفايةةةةةةةةةةةةةةةةةةةةةةةةةةةةةةةةةةةة.........

معلش أنا آسف لكل واحد هيقرى الموضوع ده بس كان لازم أكتب كده وأفش غلى عشان مش عارف أنام وإللى زاد وغطى إنى لسا متخانق مع أبويا وطبعا كالعادة على أسباب تافهة ماتستحقش تكات صوابعى ع الكيبورد عشان أحكيها ومش هحط صورة للموضوع عشان الموضوع بايخ مالهوش صورة غير جوا كل واحد فهم كلامى كويس يبقى يبص جواه هيلاقى صورة الموضوع بتلالى قصاد عينيه.

أنا بتأسف تانى مرة لكل الناس عشان دى الحاجة الوحيدة إللى أقدر أعملها دلوقتى

(الأسف)

وتصبحوا على خييييييييييييييييييييييييييييييييييييييييييييييييييييير.................